رباعيات صلاح جاهين
- مع ان كل الخلق من اصل طين
وكلهم بينزلوا مغمضين
بعد الدقايق والشهور والسنين
تلاقي ناس اشرار وناس طيبين
عجبي
- سنوات وفايته عليا فوج بعد فوج
واحده خدتني ابن والتانيه زوج
والتالته اب خدتني والرابعه ايه
ايه يعمل اللي بيحدفه موج لموج
عجبي
- الكون ده كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
ده ياما فيه سؤلات من غير ردود
عجبي
- احب اعيش ولو اعيش في الغابات
اصحي كما ولدتني امي وابات
طائر.. حوان.. حشره ..بشر..بس اعيش
محلا الحياه ..حتي في هيئة نبات
عجبي
- ورا كل شباك الف عين مفتوحين
وانا وانتي ماشيين يا غرامي الحزين
لو التصقنا نموت بضربة حجر
ولو افترقنا نموت متحسرين
عجبي
- انا كل يوم اسمع ..فلان عذبوه
اسرح في بغداد والجزاير واتوه
ما اعجبش م اللي يطيق بجسمه العذاب
واعجب من اللي يطيق يعذب اخوه
عجبي
- اقلع غماك يا تور وارفض تلف
اكسر تروس الساقيه واشتم وتف
قال..بس خطوه كمان ...وخطوه كمان
يا اوصل نهاية السكه يا البير يجف
عجبي
- السم لو في الدوا....منين يضر
والموت ولو لعدونا...منين يسر
حط القلم في الحبر واكتب كمان
..والعبد للشهوات..منين يبقي حر
عجبي
- انا كنت شيء وصبحت شيء ثم شيء
شوف ربنا ..قادر علي كل شيء
هز الشجر شواشيه ووشوشني قال
لا بد ما يموت شيء عشان يحيا شيء
عجبي
- مرحب ربيع مرحب ربيع مرحبه
يا طفل يا للي ف دمي ناغا وحبا
علشان عيونك يا صغنن هويت
حتي ديدان الارض والاغربه
عجبي
- فتحت شباكي لشمس الصباح
ما دخلش منه غير عويل الرياح
وفتحت قلبي عشان ابوح بالالم
ما خرجش منه غير محبه وسماح
عجبي
- غمست سنك في السواد يا قلم
علشان ما تكتب شعر يقطر الم
مالك جرالك ايه يا مجنون ..وليه
رسمت ورده وبيت وقلب وعلم
عجبي
- العشب طاطا للنسايم ونخ
اخضر طري مالهش في الحسن اخ
عصفور عبيط انا غاوي بهجه وغنا
ح انزل هنا وانشا لله يهبرني فخ
عجبي
- اوصيك يا ابني بالقمر والزهور
اوصيك بليل القاهره المسحور
وان جيت في بالك اشتري عقد فل
لاي سمرا وقبري اوعك تزور
عجبي
- ولدي اليك بدل البالون ميت بالون
انفخ وطرقع فيه علي كل لون
عساك تشوف بعينك مصير الرجال
المنفوخين في الستره والبنطلون
عجبي
- انا اللي بالامر المحال اغتوي
شفت القمر نطيت لفوق في الهوا
طلته ما طلتوش ايه انا بهمني
وليه ما دام بالنشوه قلبي ارتوي
عجبي
- يا عندليب ما تخافش من غنوتك
قول شكوتك واحكي علي بلوتك
الغنوه مش ح تموتك انما
كتم الغنا هو اللي ح يموتك
عجبي
- لا تجبر الانسان ولا تحيره
يكفيه ما فيه من عقل بيحيره
اللي النهارده بيطلبه ويشتهيه
هو اللي بكره ح يشتهي يغيره
عجبي
- البط شال عدي الجبال والبحور
ياما نفسي اهج ..احج ويا الطيور
اوصيك يا ربي لما اموت والنبي
ما تودنيش الجنه ..للجنه سور
عجبي
- ولو انضنيت وفنيت وعمري انفرط
مش عاوز الجأ للحلول الوسط
وكمان شطط وجنون مانيش عاوز
يامين يقول لي الصح فين والغلط
عجبي
- الحلو يم اليم صابح رايح
سارح في حضن الميه سابح سايح
الحلو داب في البحر قلت ادوقه
وجدت لسه البحر برضك مالح
عجبي
- ورد في ورق سلوفان يا حلوه اهديلك
والا انقله بالطيت في شتله واجيلك
الاولاني لو وحا بحناني
عجبي علي التاني بايه يوحيلك
عجبي
- انا قلبي كوره والفراوده اكم
يا ما اتنطح وانشاط وياما اتعكم
واقول له كله ح ينتهي في الميعاد
يقول بساعتك والا ساعة الحكم
عجبي
- قالوا السياسه مهلكه بشكل عام
وبحورها يا بني خشنه مش ريش نعام
غوص فيها تلقي الغرقانين كلهم
شايلين غنايم والخفيف اللي عام
عجبي
...................................................................................................
